القلب ينبض بالغلا والحب يجري فالوريد
وأهل القلوب الخضر مثل الناس خضر عروقها
وأنا ليا هب الهوى من شرق ما عندي جديد
قامت ذعاذيع الهبوب اتسوقني وأسوقها
اقادني سلك الحرير ابدون شرط ودون قيد
وأنا على قيد الحياة اللي قليل أوفوقها
رجلي على البيدا تهادى.. مير عيّت لا تهيد
وعيني تخيل المرزمات اللي تلوح بروقها
يا فزعة الله ما نبا فزعة قريب ولا بعيد
ما ذقت طعْم النّفْعة اللي ما طمعت أذوقها
العام أهيض امن الطيور اللي على خضر الجريد
واليوم ما بلّت على خضر الجريد حلوقها
بيني وبين ألحانها للحين ما ذاب الجليد
والشمس حال الليل بين اغيابها واشروقها
عز الله إني يوم أجر الصوت ماني مستفيد
وأنا لو أنثر دمعتين.. أصدّ لين أحوقها!
ما دام قوتي قوّتي.. وإلباسي الباس الشديد
يا عوق أحاسيس المحبّة كلّها يا عوقها
أحط همّي وأذكره وأنساه في بيت القصيد
وأشيل همّ القافية وأفكارها واطروقها
مرة ذكي.. مرّة غبي.. مرّة شقي.. مرّة سعيد
مرّة تحت منظومة الدنيا.. ومرّة فوقها
ما عشت قلبي من حجر.. لو عشت ضلعي من حديد
تفرق معي سود الليال ولا تبين فروقها
واللي غلاها ما نقص قدره مع الوقت الزهيد
جتني على ذوقي وأنا ذوقي يطابق ذوقها
ما هو بشرط أنظم لها الأشواق في عقد فريد
لو إنه أبسط حق أشوفه يوم أعدّ حقوقها
الشعر ما ينقص شعور العاشقين ولا يزيد
يمكن يجمّل عاشقه ما جمّلت معشوقها
القلب ينبض بالغلا والحب يجري فالوريد
وأهل القلوب الخضر مثل الناس خضر عروقها
عايض النفيعي