السهر دربٍ عن الضيق تلقى ما يجيه
غير من نومه بعينه من الهم اضّمحل
والصدر يرتاح لا قال كل اللي يبيه
والشعر غيثٍ على ضحكته يعشب محل
من يضيّع صدق الإحساس عذبه ما لقيه
مثل من يبني خيامه على وادي فحل
لو يشد الطنب بالطنب ويوصي ذويه
كان ما روّح به السيل غطاه الوحل
وجد حالي لأجل حاله.. ويا وجدي عليه
وجد من عوده ضحى العيد عن عينه رحل
لين ياخذ حقه اللي غدابه مدعيه
حلم عمري وين ما حل شعري وارتحل
ما أقول إني محامي حماه ومحتميه
لكن أحبه وبالقلب ماخذله محل
مثل حب اللي من أول سنيني مهتويه
حل في قلبي بطاغي جماله واستحل
كل عرقٍ بالغلا يبتديه وينتهيه
وإن طلبته حل قال: الغلا مافيه حل
قالها مرة.. وأنا من تغليه اشتكيه
من يحب الشهد يصبر على لسع النحل
محتويني عن دروب الضياع ومحتميه
سعد عيني اللي بشوفه تحلّا واكتحل
من كثر ما أحاول القاه في كل الوجيه
قلت له: واللي لأجل جنته حرم وأحل
إنه أتعبني على الأرض أحصّل لك شبيه
ورحت أدوّر عن شبيهك على كوكب زحل
وابتسم لين أسود الرمش قبّل وجنتيه
وأمطرت غيمه على بسمته وأعشب محل