ودي اشوفك مجتمع في ناظري باربع جهات
بس النظر مع الاسف مايعكس الا زاويه
والزاويه تخدع وانا عندي على هذا ثبات
الارض شبه مدوره ونشوفها متساويه
لكن اذا في زاويه تجمّعت كل الصفات
اللّي نبي من خلقت الدنيا ليوم الهاويه
وفيها صفات زايده ماهيب في كل البنات
خلت معاليق الحشا مثل الرشا متهاويه
جهه ولا عاد احتمل وشلون عاد الباقيات
اللّي بقى جنت عدن من كل خيرٍ حاويه
درست فـ..الجغرافيا تاريخ دجله والفرات
تمشي على طول السنه والناس منها راويه
وانتي لحقتيني على اخر نفس قبل الفوات
واسقى حنانك داخلي كل العروق الذاويه
كنتي معي وانا معك ذاتٍ سكن في وسط ذات
والرابط اللي بيننا مثل شعرة معاويه
وفجأة تغير موقفك مني بدون مقدمات
الشك والريبه سوا في خاطرك متخاويه
وحبك على ذبحي نوا واسرج ظهور العاديات
وانتي تغيرتي علي مدري وش انتي ناويه
ماهي غريبه لو ذبحتيني ولا الميعاد فات
من حب لازم يحتمل نار الغرام الكاوية
ذكرت تاريخ الهوى عبر العصور الفايتات
كم واحد حبه نسج حوله حبالٍ لاوية
وابن الملوح حب ليلى لجلها باع الحياة
ذوى ومات من الهوى في نار حب شاويه
واليوم شوفيني عدم وخيول عمري مسرجات
واقف على حد الزمن وذياب موتي عاويه
غريب في ديرة هلي وانا اسأل الله الثبات
والنايبة تطوي سنيني مثل طوي الطاويه
جهة وسوت بي كذا وشلون عاد الباقيات
انا احمد الله يومني ماشفت غير الزاوية