بعادك
2019.12.23 | 12:01 am
ابيك الله لا يكتب بعادك
ولا يفجع فؤادي من عنادك
تحديت الظروف والف عنوه
ومثلي يكرم يمرّ بمزادك
تبيع اللي تبيعه من حلالك
انا صفقة حياتك وامتدادك
ابيك اللي حبيبي يا حبيبي
واجي عونك ومأواك وحصادك
ابيك اللي على ذوقي وشفي
وابيك اللي تخيَّرني زنادك
وابيك اللي على لقياي صامل
وتغْنيني حفاوة من ودادك
ابيك اللي تحدا ناس واجد
لاجل تثبت لهم اني عتادك
ابيك اللي لياقالو تبيها؟
تقول اني جوازك في بلادك
وعلمهم من العزوه بضيقك
ينقّصهم غلاك وانت زادك
كبر قدر وكبر هقوه وقيمه
يا وهبة من إلهي يوم جادك
فعوّضني عن اللي راح واللي
يكبّرني بعيني من مدادك
لان إله سخرني لروحك
ويكفيني أجي غاية مرادك
فلا فادك عنادك وابتعادك
ولا غيري يجي ربعي وفادك!
حنان العجمي