لا يا نسيم الصبح بعد انتحى الليل
ما جبت ليّه من عشيري بشارة
بشارةٍ ترفى الجروح المساميل
وتطلق لمسجون الضماير وساره
وتفتح مدار آمالنا للمقابيل
وتاخذ بتتويج الصدور الصدارة
من غاليٍ مالي ولا له مراسيل
بيني وبينه ما تسير الزيارة
حيه لنا عدوان جيلٍ بأثر جيل
حتى لو إن الأمن ضافي ستاره
يوم السنين الجرد ومطارد الخيل
نصد غارة ويتصدون غارة
وجدي لو إن الوجد ماله محاصيل
ربحه على راجي حصيله خسارة
عسى السحاب اللي يساق الهماليل
ينشي ولا يومر على غير داره
عله على جو الحفر له تنازيل
يسقي وطن من صد قلبي وداره
لو كان لا ودّه ولا أدرج مخاليل
مبطي وهو حاويه جو الحضارة
وليا تعدى دار ظبي الغراميل
يقلب بَرَد ولا يعلّق غباره