حادت بي خطاي عنها وإلا أنا كنت جاي
هي كانت ظروف وإلا حظها والنصيب
ماني بعارف سببها يوم حادت خطاي
انتاب روحي شعور ورابها ما يريب
الماضي اللي يساند حاضري من وراي
والمقبل من السنين القادمة علم غيب
في معركة يا اكون أو لا أكون ابتلاي
اكسب مودة عدو وإلا عداوة صحيب
ما فاتني من غنايم حرب جعله فداي
يكفيني أن السلام بداخلي مستجيب
ما كان والله غيابي رهبة من عداي
ولا تنكبت قوسي لسهمن ما يصيب
اللي عدلني عن التقسيم تحكيم راي
خسرت وإلا كسبت المعركة وش تجيب؟
هذي مطية هواي وذي مضارب عصاي
رسومها مثل فعل وسومها ما تغيب
لا تنشد الحال عن مضموني ومحتواي
خذ من عيوني جواب ومن جروحي طبيب
الجو ما هوب ماطر لو يطقطق سماي
والأرض ما هيب خصبه لو يسيل الشعيب