شف جروحي كل ما قبلت تحلف لك يمين
كثر ما اموت بغرامك واموت من القهر
معيض العتيبي من الشعراء الذين لهم خط متوازن بين التحديث وأصالة القصيدة، ويقدم أفكاره الخاصة بحرفية شاعر متمرس..وهذا النص الجديد يقدمه حصريًّا لـ “الرياضية”.

صبني في قاسي القلب يمكنّه يلين!
‏ما بعد هجرانك إلا مشاريه السهر
وين تلقى قلب مثله وعينٍ بألف عين
انت ياللي رغم ظلمك معي كلك “طهر”
كان يرضيك اتلاشى بصدري كلمتين
ذوبتني مثل ثلجٍ تجمّد وانصهر
‏شف جروحي كل ما قبلت تحلف لك يمين
‏كثر ما اموت بغرامك واموت من القهر
‏”صف جنبي” مثل ما اصف في جنبك حنين
‏خذ شعوري درع لأيامك و”محزم ظهر”
أكتبك والشعر لذة شعور السامعين
فيك ملح من المحيط وعذوبة من نهر
كل ما تقبل.. ومعك الأوادم مقبلين
فارقٍ حسنك وواضح مثل شمس الظهر
خذ بلا منه من سنين عمري لك سنين
ما هي بلحية ليالي ولا أسبوع وشهر
‏ودي.. وودي.. وودي.. وأخاف الشامتين
‏لو خسرتك بعد قدمت لك عمري مهر