أنا مع الناس عايشةٍ بـ قلب مهزوم
ما عاد يشره على.. لايمته ولايمه
لو أعلن شكثر فيه من الحزن والهموم
ماهوب مشري ولا حتى بحد سايمه
صديقتي والحياة بـ كبرها ما تدوم
اشتقت لرسالتك واسمك على القايمه
اي والله اشتقت لك واغليك كثر النجوم
ليت الصداقة معك.. صداقةٍ دايمة
من بعدك أحلى المناظر في عيوني رسوم
تبكي عليه الشجر.. وطيوره الحايمه
الأرض خضراء تحت رجلي وفوقي غيوم
ولا كـنها الأرض خضراء والسماء غايمة
وأنام وافكر بـ (رجـعتك) وارجع واقوم
لا شافتك فـ المنام.. عيوني النايمة
وإن كان ما أنتي بـ جايه بعد يومين يوم
والله يا ضحكي ماعاد تقوم له قايمة

أميرة الحمدان