أمرّ حاجة دهتني وأثّرت فيني
لا صرت ما تستطيع تذكّر الناسي
محمد السكران، الشاعر السعودي المشاكس دائمًا والمثير للجدل، يخص “الرياضية” بقصيدة تحمل بين طياتها مشاعر وأحاسيس لا ينتهي نبضها..
يا الله بعفو الكرام أنك تعافيني
أنا دخيلٍ عليك وبيتك الراسي
إنك مثل ماعطيت أيوب تعطيني
آبن آدم ضعيف وأنت الركن الأساسي
مانيب بكّاي مير أمي تبكّيني
لا شفتها فالسرير الليّن القاسي
يمه فقدتك وأنا اللي فيّ كافيني
ردي علي.. كلميني.. شتتي ياسي
أنا محمد.. عرفتيني؟ ذكرتيني؟
تعرّفي وقفتي.. نظراتي.. لباسي
أمرّ حاجة دهتني وأثّرت فيني
لا صرت ما تستطيع تذكّر الناسي
خليّني أحضن يدينك بين يدّيني
ما عاد عندي طريقة تشرح إحساسي
البيت نوره طفا، والمجلس الطيني
بعماسي أجيه وأطلع منه بعماسي
يا جعل ماهوب عقبك يا نظر عيني
والله يردك لبيتك يا بعد راسي
هاتي سنينك وخوذي زينة سنيني
أطيح عنّك ولو ما أطيح متواسي