الحب طب القلب لكن وجع راس
وانت المخير بينها في هيامك

شاعر يكتب بفكر مختلف وبلغة جميلة لا يشابهه أحد في ما يقدم، خص “الرياضية” بهذا النص:
صوتك دلع .. صوتك ولع .. صوتك إحساس
يعني من أولها سحرني كلامك!
جديد ما عمري سمعته مع الناس
عشته بأحاسيسي من أول سلامك
لفا على صدري من الغرب نسناس
صادق وفاك ورقتك واحترامك
لمست صدقتك قلت للقلب لا باس
جــــــرب إذا هـــــــــذا يثيــــــــــر اهتمامك
وقبل ما تجرب هاك لدرب نبراس
مني وخذني في الشدايد حزامك
الحب طب القلب لكن وجع راس
وانت المخير بينها في هيامك
إن همت حذرا ترتدي ثوب بلاس
الصــــدق يرفــــع عند غيــــرك مقامــك
اترك وضوحك ساس مبني على ساس
وعن بوح مابك لا يطول صيامك
مدام عندك من ورى الصدر مجلاس
طيــــر علـــى أبـــراج النوايـــا حمامـك
ان طرت خذني بين ردات الأنفاس
واقفـــال تغيـــــر ارتباكـــة نظامـــك
يمكن بربكتها تقودك للاتعاس
ويمكن تعيش أحلا ليالي غرامك
يمكن ويمكن هات للوضع مقياس
ولا تــــرى ما عـــــاد باقـــي أمامـــك
إلا تمــــر الـــدرب طرقـــي وعســـاس
لحظات فيهـــــا راحتـــك وانسجامـــك
على الوفا ما هو على درب الانجاس
اركد تراك اشغلتني في خصامك
بكره تذوق الشهد من دون حراس
ويطيب حظك ويتحقق مرامك
للي على حلو اسمها تقفل اقواس
نوره يبدد لك زوايا ظلامك
واللي بضحكتها تفاصيل الأعراس
لمحتها يوم استباحة حرامك
تاخذ خيالك بين حيره وهوجاس
حتى تغني للوجود انعدامك
تتخيل أن عيونها سود نعّاس
وتعلن على حد الرموش انهزامك
وتتخيل أن خدودها يوم تنباس
من طرقة الشيله سبب لانقسامك
مابين شفتها لمدلوق الالعاس
تخفي ملامح دهشتك ببتسامك
وتمر نظراتك على حمر الاطعاس
وتلم شيحه ويتنفس خزامك
في وقتها تروى معاليق يباس
وينبت كلامك في بقايه حطامك
نرسم حديث الحب ريشه وقرطاس
وعينك لجل عينه تحارب منامك
ومهما يكون الرد خابرك قرناس
وإن شفت فيك وفيك عندي خطامك
عزه وربي ما تثمن بمقياس
تطفي فضولك في حنين احتدامك
وتشعلك للآمال في ظلمة الياس
ما كنك إلا البدر ليلة تمامك
آخر كلام العين لا تطري انعاس
باقي طلب بعده تجرد حسامك
حتى يتم النور في فيض الإحساس
عطني على هذا الكلام التزامك!!