هبت أنسام الهجوس وساقت خيال القصيدة
لين عقرب برقها السمّار ثم ذعذع هواها
مرحبا يا فتنة الخفاق يا الغيداء العنيدة
مرحبا يا اللي علي تمون لو يكبر خطاها
أنكوي من بُعدك اللي يعتبر عندي فقيدة
وأتباشر بك إليا من وصْلت الضيقة مداها
أقلطي في صدر من لا قيل له وشهو جديده
صد عن شرهة جماهيرٍ يبادلها غلاها
إيه غبت وغيبتي عن ساحة الفوضى مفيدة
ألتقط الأنفاس وأسلم من هل الغث وغثاها
عالمٍ ما من وراء منتوجها جملة مفيدة
ذا يثبتها وذاك يشوتها وآخر وطاها
بس جيت بمنوة الشاعر وسكّـانة وريده
يوم سرتني ملايلها وسهرني هواها
سقتها من نجد يوم إن صبرها وصل الحديدة
ولحقها من دورة الأيام ما يبحث خفاها
بنت شيخٍ طوّحت بالشال والهقوة بعيدة
صوب شيخٍ لاتعزوت به يلبسها غطاها
الفلاحي راعي الوقفات والأريا السديدة
وقبلة كبار المقام إليا غشاها ما غشاها
أرجحٍ كنك إليا من ضفت ديوانه تزيده
أشهد إنه مجلسٍ بالضيف والجار يتباها
إيه يا بن دري وشهود الله الخالق عبيده
والفعول الخالدة خلق الله تردد صداها
والخوي اللي سواتك لا التفت كلٍ لعضيدة
خوته هي رأس مال اللي مخوّته ايحماها
طمعتي في طيب راسه ماتطمعت برصيده
لا أرزمت شهب العجاف وحربها دارت رحاها
روّحت من نجد صوبك يا معزبها فريدة
والصدور اللي وراها يا الفلاحي من وراها