مابي يمر الوله مثل مرور الكرام
ترى اظلم الناس بإحساسه هو البادي
صوتك صدى للقصيد وللأمل والسلام
متى يفيض الكلام ويرحم سهادي ؟
لا تنثرين بطريق التيه شح وملام
ما تِنبت الروح غير الفل والكادي
القسوة اللي بعينك يا بعدهم حرام
من ياخذ أطباع غيره بالهوى غادي
يا ناعم الخد والعشره حقوق ونظام
لا تلبسين لشعورك.. لبس ولادي
تفنني بالدلع، والغْنج، والابتسام
كونيلي أول حبيبة همها إسعادي
احتلي أسوار قلبي يا عزيزة مقام
تجولي بالضلوع العوج وارتادي
ما حولك إلا غلاتك “يا حمامة غرام”
طيري مثل ما يطير البلبل الشادي
يتنفس البال صوتك والقمر لو ينام
يزهر على كل خطوة منْك فوادي
أنتِ صباحٍ يخليني على ما يرام
ما يكسر بخاطري، لو يكسر عنادي
متى يحن الغلا واستقبلك كل عام
في كل يوم بوجودك، عيد ميلادي
رباه، وبقلبي المرهف حنين وهيام
تعبت أكون الغريب وصوته بلادي