يا شجرتي جفّت عروقك وجيت بسماي
أمطرتك إحساس خايف لا السنين تحطبك
من بعد أخذتي مُرادك ما لمحتي ظماي
يوم انتظرتك على غيري تساقط رطبْك
ولا طلبتك مع الأيام.. رد لعطاي
يكفيني أشوف عينك خاليه من تعبك
كنتِ السهر كل ما ضاق المدى في فضاي
عن زحمة الناس وأوجاعي أجي واغتربك
وأنا أتورّد شعر.. ويفوح منّه شذاي
وأنتِ الندى كل ما يبْست عروقه شربْك
يومك بكفّي تردّين القصايد معاي
وتغازل عيونك الدمعة ويرمش هدبْك
قلتي تحبين: لكن كيف أحس بغلاي
إذا غرامك غلبني ليش أجل ماغلبْك؟
جيتك من الشوق تارك لك قبيلة وراي
مع أن إذا ماني أعلى ما أقل عن نسبْك
ماني بتعبان من عُمق الجروح بحشاي
متعبني أن التعب كلّه يجي من سببْك!
ياما لبس وجهي لتلميح وجهك غباي
لو انّي أعرف وش الدافع لحدّة عتبْك
ردّي كلامك قبل يجرح ضميرك وفاي
إذا خسرتك ما هو فارق من اللي كسبْك
أنا إلى الحين ماني قادر أردع بكاي
من قلت مخنوق من ضيقي وقلتي لي إبك!