أمجاد الوطن

ذكرى البطولة فرحة تحيي الأمجاد
أمجاد أخو نورة وعزه وطاريه
تفخر به الشيبان وتحث الأحفاد
على الولاء للدار وعيال بانيه
عبد العزيز وعقبه رجال أوتاد
مثبتين الحكم ما حدن طمع فيه
صقر الجزيرة في اللقا ما له أنداد
سم العدو غيثٍ على اللي مصافيه
وسط الكويت ولاهتنا زاد ورقاد
فكرٍ يجيب وفكرٍ آخر يوديه
وعزّم على رأي السعد رأي الإرشاد
رأي الحكيم اللي ربه مقديه
ليث تنهّض قال ما فيه مقعاد
ساق الركايب يم حكمٍ يناديه
عشرين مع عشرين في حرب وجهاد
اللي وقف راسه بسيفه يوطيه
يضرب على الكايد وبالسيف جلاد
مطوّع العاصي وتعرف عزاويه
إلى اعتزى منه العدو صد بحياد
صامل على الهدات مبعد مراميه
شيخ الشيوخ وواردن نجد ميراد
عزام جزام تخيّر مخاويه
خاض المعارك بين حاقد وحسّاد
خاض المعارك وأظلم الليل ساريه
ورد على عجلان في ليل مهجاد
بسيفٍ عزل راسه ومفرق علابيه
ونادى المنادي حاكم الدار له عاد
الحق حقٍ عاد وبيدين راعيه
ارتد أخو نورة مواريث الأجداد
الحكم لآل سعود ترسى مراسيه
عبد العزيز الصعب بيديه ينقاد
من قو باسه ما نتصر من يعاديه
لم الشتات وكانت جموع وأبداد
وسيّس كيان العز والحد حاميه
دارٍ بدا النهضة وفيه الأمن ساد
الحكم حكم الدين للشرع قاضيه
وخلّف زحازيحٍ على الطيب تزداد
الكل منهم بيّنات مساعيه
حكامنا للشعب تزيده إسعاد
للدار حكّام وعزٍ لأهاليه
واليوم يوم الدار هجري وميلاد
يوم الفخر عيدٍ لنا نفتخر فيه
واليوم عيد سعيد من ضمن الأعياد
عيد البلاد وعيد شعبٍ ربا فيه
وعيدٍ لنا تكريم بوسام الأحفاد
أحفاد من شارك معزي مغازيه
وأنا أفتخر لي والد وعم وأجداد
في جيش أخو نورة من أول مباديه
مشاركين بسيفٍ ورمح وجياد
في راية اللي ما تعدد حسانيه
عبد العزيز موحدٍ شعب وبلاد
ولي الأمر وواجب الكل يغليه
عسى الذي خلف لنا خير الأولاد
بجنة الفردوس يجزاه واليه
ومن عهد أخو نورة والدار يزداد
خير بفضل اللي مشوا في مماشيه
حكامنا اللي حققوا كل ما كاد
ومحققين لشعبهم كل أمانيه
أمن وأمان ووافر العز والزاد
ثوب الفخر للشعب بالعز كاسيه
غصبن على العدوان ومن كان حسّاد
فرح لنا والعز تبرق مناشيه
حكامنا للشعب غيثٍ للأكباد
غيثٍ لنا ما فيه قولن وتمويه
والشعب للحكام ماهوب جحّاد
الشعب ما يجحد نعيمن ربا فيه
اسم السعودي شامخٍ فوق الأشهاد
من فضل حكام تعزه وتغليه