زاد الظلام وخالطك ليل يا ليل
ذابت عيوني ما بدت نجمة الصبح
طالت مشاويري وانا احط واشيل
وازيد من خسارتي في رجا الربح
وانا براسي ما بروس الرجاجيل
من صامل الهقوة .. ومن طايل الشبح
وبصدري المتضايق من التفاصيل
للهجن درهامه .. وللعادية ضبح

انا ادري ان ماللمقادير تبديل
لكن يا ليت لشرهة نفوسنا كبح!
على العموم .. الله وكيل المقابيل
بس الصراحة ما ذبح هقوتي ذبح..
الا رفيقٍ كنت اقدره بالحيل
يا ما انجلت صورتْه عن صورة القبح
اثر عواه اول كركتر وتمثيل
وان كلّح الشارب يصير العوا نبح
مشعل الضوي