يا صاحبي دام عقلك ما يبي له شوير
لاتبرر اخطاك لا كثرت معاذيرها
ما دام ما ودك تشاور .. أجل ما يصير
تشره علي إن زعلت ، إلعب معي غيرها
ضميرك إن مات ما تلقى بداله ضمير
والصحبه إن ما تسرك ، تفتقد خيرها
هم ضحكولك وبعض الضحك ما هو بخير
دامك ما تحسب حساب الناس وتثيرها
تعبت وانا اتحمل من خطاك الكثير
واسامح ايدينك اللي بان تقصيرها
وأدلك اقرب دروب القلب واقول سير
وتسير لكن تعكس من الجفا سيرها
أحلامك اللي طرت لك ماهي أحلام خير
مهما يوَهمّك من آفتى بـ تفسيرها
وامالك اللي بلا جنحان تبغي تطير
ماتت قبل لاتطير اصغر عصافيرها

الخير خير النفوس اللي حكيها يسير
اللي عطت من سكات وسرها فـ بيرها
كانك ملكت الفلوس وبس .. إنت الفقير
فقير .. يوم إنك مفلس .. ما معك غيرها
فعل العقل للـ الكبير ، وفعل غيره صغير
والله له الحكم …فـ الخلق …وتدابيرها
على العموم ان عدلت اشكرك جداً كثير
وان ما تعدلت قلنا … (خيرها بـ غيرها)