تقلد الأمير نواف بن محمد، نائب رئيس الاتحاد الدولي لألعاب القوى وعضو شرف نادي الهلال، خلال مسيرته العملية العديد من المناصب عطفًا على تميزه في العمل الإداري وتمرسه، ما أكسبه خبرة عريضة.
وسبق للأمير نواف بن محمد تسلم العديد من الملفات الساخنة خاصةً أثناء عمله في اللجنة الأولمبية السعودية، إضافة إلى كونه رئيسًا للاتحاد السعودي لألعاب القوى لفترة طويلة، حيث ترأس العديد من البعثات الرياضية السعودية في مشاركات عالمية وقارية وإقليمية.
وفي الجزء الثاني من حواره مع “الرياضية” يعترف الأمير نواف بن محمد بتشجيعه للنصر، وحضوره إلى الملعب لمساندته رغم لعب الهلال مباراة أخرى في الوقت نفسه، ويجدد إعجابه بماجد عبد الله قائد فريق النصر والمنتخب السعودي الأول لكرة القدم سابقًا.
وكشف عضو شرف نادي الهلال عن أنه تم إبلاغ نادي النصر بالعالمية وهو في الملعب، قبل مباراته التي ساهمت في وصوله إلى كأس العالم للأندية.
وبيّن الأمير نواف بن محمد أن سامي الجابر، موهبة فذة ويعد أكثر لاعب خدم الهلال، مؤكدًا أنه أكثر شخص دعمه منذ ظهوره حتى اعتزاله كرة القدم.
01
انتهت أسطوانة العالمية صعبة قوية على يد الرجل الخلوق فهد بن نافل اللي يرأس النادي حاليًا.. ليش استطاع ابن نافل أن يحقق ما عجز عنه الرؤساء الآخرون؟
أولًا، بالنسبة إلى نادي الهلال إذا بتاخذها من هذا المنطلق كل واحد من الرؤساء السابقين كان مميزًا في وقته حقق إنجازات وبطولات، وهذي البطولة كانت من أول بطولة منقسمة إلى بطولة أبطال وكأس الكؤوس، وأعتقد أن الهلال اللي حققها حقق 7 منها، مع السوبر “بطولتين”، ولما صارت المنظومة واحدة أصبح لها قوتها الحقيقية، وأصبح أنك أنت يجب أن يكون لك يد قوية في هذا المجال، المنافسة كانت شرسة، وكان الهلال بيصل لو لاحظت أنه يطلع من الأدوار التمهيدية، مرتين أو ثلاث من 16 مرة، هذه إحصائيًا تكون دائمًا في أعوام اللي النادي بيعيد هيكلة نفسه، وكان الهلال ميزته إنه ما يغيب أكثر من عام ويرجع بقوة، ولو لاحظت الهلال وصل كم مرة دور الثمانية، خلينا نترك دور الثمانية، كم مرة وصل دور الأربعة؟ ووصل للنهائي؟ ومع هذا كله لم يوفق في أن يتأهل إلى بطولة العالم اللي مرت بتعثرات كثيرة، ولكنها استمرت في الفترة الأخيرة، وأعتقد من وجهة نظري أن الهلال 2017 كان أفضل، ولكن ظروف الإصابات، وهذا شي نقوله إحنا لكنه في واقع الأمر خسر، وفي 2014 الكل يعرف لم يوفق حتى لما يقولون على الحكم، أنا أقول ضيعنا 5 آلاف “جول”، يعني لما أضيع لي 10 أهداف أو 12 هدفًا أو سبعة أهداف حتى هناك في أستراليا في سيدني، أنا أعتقد أن في 2014 كان يمكن يكون بن نافل جاء قبل ولا حققها، حنّا بالنسبة لنا هذا نادينا، من هو الرئيس حنّا معاه وراه ودونه، كسب خسر مثل ما قالوا، لكن في النهاية ما يصح إلا الصحيح، كلما أنت كنت قاعد تتعلم وتعد وتستمر، الظروف تخدمك مثل ما خدمت غيرك.
02
لا خلاف على سامي كلاعب سواء من الهلالي أو غير الهلالي.. ولكن هل استحق سامي الجلوس على كرسي رئاسة الهلال؟ هل استحق سامي أن يكون مدربًا أول للهلال؟ هل استحق أن يكون مشرفًا؟
خلنا نأخذ أولًا المشرف، لا نختلف عليه كلاعب، لو خذيته بالإحصاء أو بالنتائج، أعتقد أكثر لاعب خدم نادي الهلال هو سامي الجابر، وليس هناك مقارنة، وسامي الجابر موهبة فذة كان عنده حضور وطموح، ومن عرفته أنا وراعيته أعوام طويلة، ميزته إنه يسمع ويقيّم ويأخذ، وبعدين الشي الثاني القليل من اللاعبين عنده ثقة بالنفس، سامي عنده ثقة بنفسه في الحقيقة، فمن هذه الناحية سامي وجد أن هو عنده مجال خصب عشان يعمل.. ولما اعتزل كانت الظروف المحيطة به من أروع ما يكون، اعتزل في وقت مميز، كان يقدر يعطي عامين، لكنه اعتزل، الشي الآخر أنه مثّل المنتخب في كأس العالم أربع مرات، فأنت يعني لما تتعامل في هذا الجانب، كله في صالحه، وبعدين اللي جا أحسن منها لما بدأ إنه يكون مشرف ومساعد مع المدرب، وكان المدرب البلجيكي جيريتس مغرم بذكائه وسرعة تعلمه، هذا أعطاه ثقة في نفسه أكثر وأنا أعتقد أن هذه ضرته بعدين.
03
استحق الإشراف ولا ما استحقه؟
ما فيها كلام، هنا المشرف لما يكون قوي، لما يتغير عليه الجهاز الفني ممكن يتغير عليه فريق العمل هذا ممكن يؤثر عليه في نقطة أخرى، اللاعبون لما يبتدي الواحد يعرف أنه ماشي ولا له نظرة أن فيه واحد أصغر منه بعطيه الفرصة، هنا الشي هذا حاصل لك حاصل لك، أعتقد أنه هذه كلها جعلت سامي يصبح له مواقف من بعض اللاعبين، مواقف من بعض الإداريين، وفي نفس الوقت تعرف أن الرئيس هو القوة، لما يعطيه القوة ويدعمه يمشي الواحد، لكن هنا يجب اللي مثل سامي ينظر إلى أبعد من هذا أن يحسب حساباته مع الآخرين، في ناس هو ما عنده الصبر، يعني خلاص أنا خذيت اللي أبغاه أو بسوي شي، رضيت أنت أو ما رضيت خلاف وانتهى الموضوع، هذولا تتراكم، اللي غلط فيه وأنا اعتقد أنه ما سأل ولا حاجة وأخذها ومشي فيها اللي هي مسألة التدريب.
04
ما كان يستحق أنه يكون مدربًا أول للهلال؟
بدون شك أنه استعجل فيها، شوف.. الإدارة شي والتدريب شي، من هو من المدربين واللاعبين الكبار اللي برز واستمر؟ قليل، هذا يبغالك جلد، وبعدين تفرغ أن تصبح مدرب، مشكلتكم إنكم تسألوني ولا ترجعون أنا إيش قلت في وقتها، وعدته وكررته، قلت حينجح لو أحسن اختيار المساعدين، المشكلة وأم المشاكل في الاستيعاب، الحين الطباخ المتميز الموهوب الصغير لما يروح يبغى مساعدين يلقى المساعدين مع طباخين عالميين فهذا عشان يترك شغله وييجي معك، من أنت عشان يخاطر ويجيك، لسه ما شافوا شغلك، وهل عندك أنت المال ولّا المطعم، لما يجي يقولك أنت روح جيب المساعدين وحنا ندبل لهم الرواتب، فالجهاز اللي كان معاه ما كان على المستوى اللي كان لازم يكون معاه عشان يبتدي ومع مين؟ مع نادي جماهيري.. وفي نفس الوقت للأمانة الفريق قدم مستويات ولكنه خسر بعض المواقع، ولما ترجع، لو فيه واحد أعمى يشوف هذاك الحارس ما يبقى، وارجع لمباراة النصر والهلال 2ـ1 يعني أي أحد موجود كان يقول هذا الحارس ما يقعد.
05
اللي هو السديري؟
نعم، لأن في تصرفات عملها خسرتنا نقاط، والمباراة هذيك من تعادلنا إلى خسارة، ولو جلست على التعادل كان انتهى الدوري لنا، بعدين في ظروف معينة، ارجعوا للتاريخ، ذيك سامي الجابر كم غير من الطاقم اللي معاه؟.. أكثر من واحد، وآخرتها كان فرصته لما حسن الوضع، أن نادي النصر الإماراتي لما ألغى عقود المدربين كان عنده فكرة بالتواصل معهم أخذ اثنين ثلاثة مساعدين له، هذه التي قصمت ظهر البعير.
06
طيب.. سامي الرئيس؟
هذا أكبر منه، أكبر منه حقولك ليه، النادي ليس فريق كرة قدم، أنت تدير نادي ولّا تدير فريق؟.. إذا فريق، أنا أعتقد أن سامي يستطيع في أي وقت أن يبدأ يدير فريق، وحيكون متمكن وبخبرته والكاريزما اللي عنده، سامي ما عنده مشكلة، وبعدين لما أقول عليه قائد كرئيس وآراؤه في بعض الأمور اللي ما تخصه هذه في تعليمات خط أحمر، فالناس تمشي بانضباطية.
لكن لما تجي أنت تقول رئيس.. العقود والتسويق الأمور الاجتماعية الألعاب الأخرى الأهم من هذه كلها، التوجه العام كيف هو يستطيع أن يتعامل مع توجيه الجهات العليا، هذه ما هي قضية رئيس، أعتقد أنا أنه أجبر على رئاسة النادي.
07
يعني كرسي الهلال أكبر من سامي؟
ما أقولك أكبر من سامي، ما أعتقد أنه سامي إذا هو عضو مجلس إدارة مسؤول عن كرة القدم.. نعم، لكنه يكون رئيس النادي!
08
ما تبغى تقولها بشكل مباشر.. أكبر ولا مو بأكبر؟ كرسي نادي الهلال أكبر من سامي؟
أنت تبغى تحط هذا في عنوانك، أنا ما أقبله “اسمح لي”..، لأني ما أبغى استفز، أنا أحبه، والشخص هذا إذا في واحد حرص عليه ولّا تعايش معه وأنا مستعد وهو يقول إذا أحد حرص عليه أو أحد رعاه من طلع لين أعتزل زيي أنا، “بحق”، ولكني أنا ماني من الرجال اللي أجي وأحكي وأقول أنا سويت كذا وكذا، بالعكس بالنسبة لي وأعيد وأكرر أنا أعتقد أنه استعجل في تدريب نادي الهلال، ولو صبر وأخذ المعترك مع النادي أكثر وأكثر وأكثر كان يمكن يوصل، والظروف تخدمه وإنه يمسك نادي الهلال لثلاثة وأربعة أعوام، وبعدين هو رجل محترف، واللي يدلك أنه أراد بعدها إنه يروح ويكمل مسيرته، وراح للإمارات ورجع بعدها وراح لقطر مع نادي الريان مدري نادي العربي وقيّم الأمور واعتذر، هذا ليه؟.. لأنه بدأ يعمل حساباته، وحصلت له فرصة العمر مع نادي الشباب وما استمر، هذه تبعياتها أنه مع نادي الهلال اللي نجحه كلاعب واللي نجحه كإداري واللي نجحه كنجم أعتقد أنه استعجل، استعجاله جعله يقبل العمل، بالنسبة لرئاسة النادي أعيد وأكرر ليست إدارة كرة القدم، والأشياء المطلوبة منه أكبر من اللي هو يتصوره، وأعتقد أنه أجبر على رئاسة نادي الهلال.
09
هل فعلًا قدت الصوت المطالب بإقالة سامي الجابر من التدريب في الاجتماع الشرفي؟
قدته لا، لكن حنا جينا كان الموجودين 12 عضو شرف.
10
كلهم صوتوا؟
11 عضو شرف صوتوا.
11
يعني الأمير عبد الرحمن بن مساعد هو اللي ما صوت؟.
هو أول واحد.
12
طيب من اللي ما صوت؟
واحد من الـ 12، ولكن القضية ما هي هنا.. القضية ما هو أنا اللي أقود ما كان فيه قيادة، أحنا لما اجتمعنا كان عشان يطلع القرار مننا ونتحمل مسؤوليته، عشان ما يكون الهجوم على الأمير عبد الرحمن.
13
هل فعلًا أنك في يوم من الأيام قلت بأنك تتمنى ماجد عبد الله في الهلال؟
مين اللي ما يتمنى.. روح علمني عطني واحد ما كان يتمنى لاعب مثل ماجد عبد الله، ماجد عبد الله لاعب متميز.
14
هل فعلًا أنك كنت نصراوي وذهبت إلى النصر والأمير عبد الرحمن بن سعود ما تقبلك؟
لا أبدًا، عمرها ما صارت، اللي حصل بكل بساطة أنا رجل رياضي، النصر إدارييه ورؤسائه واللي فيه عيال عم، لاعبيه من أهل الرياض، كلنا عايشين مع بعض ونلعب في الحواري مع بعض، كثير من لاعبي النصر لا جا رمضان تحصلنا بالليل، فكثير منهم أعرفهم، عايشين معنا في بيوتنا، بعلاقاتنا، زملاء دراسة، فمن هنا أنا ما عندي مشكلة أني هلالي ولا نصراوي، فكانت لما تجي مباريات تحصل كثير من لعيبة النصر كنت ألعب معاهم كورة.
15
هذه القصة.. ولا قد شجعت النصر في حياتك؟
إلا، شجعته طبعًا.
16
متى؟
أول ما شجعت النصر عام 87 في نهائي كأس الملك ضد الاتحاد، وكانت من أجمل المباريات.
17
يعني كنت تشجع النصر فعلًا؟
المباراة هذه تقولي شجعت النصر؟.. وفي مباراة شجعت النصر لأن فوز النصر على الشباب يخلي الهلال البطل، وفعلًا حضرت المباراة، الهلال يلعب مع الأهلي في جدة في نفس الوقت والنصر مع الشباب، وحضرت المباراة وشجعت النصر.
18
ما قد شفت هلالي يشجع النصر؟
أشجعه.. يوم فاز، والهلال فاز هناك خذ الهلال بطولة الدوري.
19
أنت شاهد على العصر.. لا زلت على موضوع أن النصر وصل إلى العالمية من الملعب وليس من خلال المكاتب؟
الحين أنا، أعيد وأكرر، تكلمت عن هذا مرارًا وتكرارًا، نادي النصر رُشح من الاتحاد الدولي، لما أرسل مذكرة قال رشحوا ممثلكم، ولم يحدد الاتحاد الآسيوي، لأن هي كانت تجربة في البداية، فقال رشحوا ممثلكم.. في ذاك الوقت البطولة قائمة.
20
عام 1998م كانوا يلعبون كأس آسيا الثامنة وبعدين لعبوا السوبر؟
عشان أكون معك صادق، لما عمم الموضوع وعرفنا عنه، ما كان معروف من بطل آسيا، بطل الأندية ولا كأس الكؤوس، كان باقي فيها نحو خمسة أو ستة شهور عشان يبين، والاتحاد الدولي أصر أنه في وقت معين لازم تردوا علي، هنا دخلنا أحنا، التفسير قالوا الكوري اللي هو بطل، قلنا بس الاتحاد الدولي ما قرر، قالت لجنة المسابقات ما دامه ما قرر وبطولة السوبر ما لعبت خلوا بطولة السوبر.. أحنا نيتنا وشو؟، وليه أحنا تحركنا؟.. لأنه عندنا فريق، طبعًا حصل اللي حصل، إن نادي النصر بُلّغ قبل المباراة أو حتى قبل ساعات وهو في الملعب ترى الفائز في هذه المباراة حيصير كذا وكذا وكذا، وفاز نادي النصر، بعدها قبل ما يروح نادي النصر انتهت البطولة، الفريق الياباني “الكوري”، الكوري ولا الياباني؟ أظنه الياباني، احتج وقدم مذكرة فيها وأرسل للاتحاد الدولي، المهم رجع ثاني مرة إلى الاتحاد، ولجنة المسابقات اجتمعت وأصرت على النصر لأنه صدر منها هذا القرار وما بتت، خلت المكتب التنفيذي هو اللي يبت، لكنها أيدت بقاء النصر وهذا اللي حصل.
21
ليش أنتم يا الهلاليين تقولون: أنا أتمنى ماجد، فرحت لفوز النصر في مناسبات معينة، وقفت مع النصر للترشيح؟ الأمير عبد الله بن مساعد يقول أفرح لفوز النصر عشان الأمير تركي بن خالد وعشان فيصل بن تركي وماجد عبد الله، لكن في المقابل النصراويين ما قد قالوا إنهم يبون ناديكم؟ ليش؟
والله مدري، اسألهم، تسألنا أحنا؟.. أحنا الحمد لله متمتعين بنادينا، ومتمتعين بالمباريات ومتمتعين بإنجازاته وفي نفس الوقت حريصين على علاقتنا مع الجميع في نطاق الاحترام والتقدير، نقعد نقابل خلق الله وراك ما قلت لي، ولا قال لي؟ خلي كلن على راحته.
22
ممكن تجلس على كرسي رئاسة الهلال في يوم من الأيام؟
إن شاء الله.
23
مخطط لها يعني؟
لا ما خططت لها، أنت تقول لي وأنا أقول إن شاء الله.. الآن الوضع يختلف كثير عن أول.