وش اكتب والسوالف تنكتب باللوح
وما يكتبه ربي تشوفه أقداري
أشوف الكون ساكت والكلام يفوح
من احساس الحياة بحكمة الباري
شعرت بما شعرته والخيال صروح
يخلي الأرض تتراقص بأشعاري
لو اتبسم تبسام الحزن مفضوح
ولا ابشع من تبسامي سوى انكاري
على طعمن يحطه بشبك طاروح
عشان يبيعه البايع على الشاري
لك الله لا تغني يا حمام الدوح
ترى صوت الحنين يدمر أسواري
أنا من أمس قبل أرقد وأنا مجروح
وقمت اليوم وجروحي هي أخباري
أبي إحساس حب وانشراح وبوح
وأبي لي عقل ما يهلك من أفكاري
وأبي لي وجه دايم كلمته مسموح
ولا يستهلك أعذاري من أعذاري
أنا إنسان والإنسان قلب وروح
لحد يقتل بقلبي روح إصراري
لو أني ضارب المجموع بالمطروح
طلعنا بالنتيجة قبل ما نباري
ولكن الضمير وصوته المبحوح
يصحي قلبي النايم على أسراري
أحسب أني مشواري لا جيت أروح
واثاري ضاع مشواري بمشواري
أداري اللي أحبه والمحبة جروح
وأنا داري ما يدري عن هوى داري
وش اللي جاب هالطاري وأنا مجروح
أنا مدري وش اللي جاب هالطاري