نص خاص

باخذ راحتي

إلى متى وأنا أتسامح وأخفي الوجه الحزين
وإلى متى عوجاك تتمرّد على سماحتي
شاعر يكتب بنفس مختلف.. يحمل وجه الشعر والسحر معًا.. سعيد بن مانع خصَّ “الرياضية” بهذا النص:
ما جيت أرجّع شيء أبد جيتك وعندي كلمتين
هذي ترى صراحتي لو توجعك صراحتي
ماجاك جاء من طيب خاطر بس بأخذ حاجتين
أبي أخذ الباقي من شعوري وأبي أخذ راحتي
إلى متى وأنا أتسامح وأخفي الوجه الحزين
وإلى متى عوجاك تتمرّد على سماحتي
وضحّت لك والظاهر إنّك ما تحب الواضحين
وأشوف شوقك قام يستعجم على فصاحتي!
دلّة وصالك يوم جيت تصبّها لي باليمين
قبضت قلبي دونها من قبل لا أقبض راحتي
عطيتك الجنّة لجل تهنا بـ جنّة عاشقين
وتركت كل أطيابها.. وأكلت من تفاحتي
لا تجيب طاري للوفا ولا تلوّح بالحنين
ما لك بها هذي شعاراتي وهذي ساحتي
وإن قلت وين الطيّبين؟ أقول باقي طيّبين
من وين ما أمتد الضياء تكبر معه مساحتي
تكشف لك الأيام لا كثروا عليك العابرين
وكني أشوفك تقطع الرمضاء و تنشد واحتي
أنا رسمتك حلم يزهى لوحتي طول السنين
مثل ما هذي ريشتي هذي بعد مسّاحتي