مساء الانتظار اللي لغير للناس
غياب الناس عنّه ، أصغر همومه
يحسبونه وحيد ويبغي الجلّاس
وهو ذاكرته من الناس مزحومه
يوسوس بس وسواسه مهو خنّاس
لذلك لايمه ما يقدر يلومه
لأنه يفهم اش تعني - لغة الاحساس
ويترجمها لغة .. لـ الناس مفهومه
تصاويره اذا هبّت مع النسناس
مع مرور الزمان تصير معلومه
يحب الفكرة التي تولد من الياس
تجي واهي عن التقليد معصومه
تريّا قدومها تحت أعين العسّاس
وهي مثله وحيده ترقب قدومه
لخاطر موعده جهّز : قلم ، كرّاس
ومن كثر الأناقة .. رثّه هدومه
نفد كأس الصبر والشوق يملي الكاس
شرب من ضيقته ، وتقوّت عزومه
سهر يا لين ما صاب المساء نعاس
سهر يا لين قام الصبح من نومه
سهر طول الزمان ، يصبّره : لا باس
مصير الصايم .. بيفطر بعد صومه