المسافر

واقلبي اللي ممتلي رهبه وخوف
يا كم تكاسل للحياة وكم نشط
على كثر ما واجهته من الظروف
من رحمتك يا رب عمره ما قنط
ماعاد لي في سالفة عمري شفوف
امرها مرور من مر وفقط
من أول أحط النقط فوق الحروف
واليوم خليت الحروف بلا نقط
ماكل صح يجنّب الناس الحسوف
الصح في الوقت الغلط يطلع غلط
تقول في راسي ترزام القنوف
يا ليت في قلبي شعيبٍ منبسط
ترى المسافر ما يمل من الوقوف
الا الوقوف اللي على سير الشنط
وترى الكتب للناس ماهي للرفوف
وترى الكريم اللي ليا أعطى ما شرط
الحب ما فيه أقوياء ولا ضعوف
فيه القلوب تصير قلب وتختلط
يا سيد الباقي من آداب الوصوف
عيونك الفصحى وأنا شاعر نبط
اللي على عنقك من اللولو يطوف
والله لو أنه من إحساس انفرط
على السمار اللي من البيض امخطوف
والا على عود ِمن الله منربط
إن كان قلبك لا يحن ولا يروف
تبنا من الجد وقلبناها عبط