نص خاص

درب الحياة

يا ظلمة الليل والشاعر ما يبحث خفاه
إلا بلحظة حنين لعالم الغايبين

عايد حواس الحازمي.. شاعر سعودي شارك في “شاعر المليون”، يقدم هذا النص الخاص المليء بإحساس مختلف..
بين المهد واللحد نمشي بدرب الحياة
والوقت كرت العبور لعالم الراحلين
يا عالم الغيب وين يكون درب النجاة
متمرجحة خطوتي ما بين شك ويقين
اشرب من العمر وإثر العمر خاين وماه
كم شح وأضمى خلايق قبلنا مرتوين
فكرت شفت الشجر بالدفن عمره بداه
مذهول شفت البشر في دفنهم ميتين
يعدي اليوم هذا منتظر وش وراه
ومعدي الأمس قبله لين راحت سنين
أقفت سنيني عتب صاحب رضايه رضاه
من رحلة الحب ما حصلت غير الونين
بعض الجروح الزمن يبطي وهو ما محاه
آيات مسحٍ عليها يوقض النايمين
تشبه لذيك النقوش اللي بصدر الصفاه
اللي حكت عن حضارة ناسها الأولين
نقاشته روحو في درب كلٍ مشاه
لكن بقت شاهدة وش سوو العابرين
ياليل أنا شاعرٍ قفر المعاني وطاه
وذبحت بأرضه من جزال المعاني سمين
غنيت للحب مازوّد متاع الرواه
شعرٍ يصح الجروح ويطرب السامرين
كم قلت وين الهوى لو هو يمن بعطاه
متسولٍ للفرح لله يا محسنين
معازف العمر وش لي مِنّها غير آه
لحن الفرح غيّبه لحنٍ بعمري حزين
يا ظلمة الليل والشاعر ما يبحث خفاه
إلا بلحظة حنين لعالم الغايبين