سلاح الزمن

ياشين الكلام الجارح اللي رقابه عوج
يضيّق وسيع الصدر ويعقّد حجاجـه
سلاح الزمان الألسنه والرصاص هروج
عسى الله يخارجنا من الخبل وازعاجه
لو إنك تشاهد كل ليلة زراق الموج
معاد البحر يخلع ولا تلطم أمـــواجه
تدور الحياة وكل فوجا بداله فوج
وتحد الظروف وكلً يعدّ ما واجه
كسرت الخواطر بالخطر والعلوج علوج
وعرفت المرض وابدعت في وصفة علاجه
لا تحرص على اللي رفقته مالها منتوج
ما يفزع مع الفزعه ولا يقضي الحـاجه
ضعيفاً لو ان المشكله بابها مزلوج
ما جنّب عنه لين انه يفـك مزلاجه
يشرهك فـ العاقل وينشبك بالمرجوج
ويحرجك واعصابه ووجه بـ ثــلّاجه
لعله فدا اللي للنقاء والشقاء مسروج
يابعده عن الدنعه ويابعد منهاجه
بعيد المراس الوافي الصافي الهجهوج
على مجلسه روس الرياجيل منعاجه
عدوّ الرّدا صدره على المخطيات فجوج
لا منّك نصيته لا تعذّر عن احراجه
سواة الجبل ما شال هم الرياح الهوج
تمره مرور كرام ما غيّرت حاجه

سعود الكرشمي