عمري مهر

يا مقفيه لو من جهتك البرق لاح
غسلت قلبي عنك لين انه طهــر
حبل الوصل مقطوع ويدينه شحاح
والزرع راح حطام من بعد ازدهــر
روحي مراح الطير خفاق الجناح
اللي كفخ من كف راعيه وشهر
لا ترحمين من السهام ولا الرماح
ولا تذخرين عن العيون من السهر
الغالي اللي من عيون الشوق طاح
حرام ما يرجـــع ولو ياخـــذ دهــر
اســـلا مع الايام وتطيب الجـــراح
وانسى لو ادفع من شقا عمري مهر
من لا صبر ما نال حلمه واستراح
لو الصبر يومه على الصابر شهـر
مافيه احد عاش الحياه بلا كفاح
لو هو من النعمه على جاري نهر
انس الفشل دايم وفكّر فـ النجاح
واقطف من انصاف الفرص قطفة زهر
الجاي عدّه خير واللي راح راح
اعط المقابل وجه والمقفي ظهر
العافيه من نالها مطلق سراح
اقولها وبـ صوتي العالي جهر
ومقابل اصحاب الاساءه بالسماح
يزيد عدوانك قهر فوق القهر
وتواضعك يرفعك يامال الصلاح
الكبر عيب الآدمي مهما اشتهر