البارحة
البارحة "بارحه" لون السحاب احمر
والهم يجتاحني والليلة.. الليله
عيت تعدي وتقلب وجهها الاقشر
يا الله بجاهك.. وجاهك يعدل الميله
كبرت راسي.. ولكن الهموم اكبر
حطت على القلب لين اخرج تفاصيله
شايف وساكت وخايف لي سنة واكثر
والهم ضيفي وقهواني فناجيله
شرب.. واحترت كيف ارقد وكيف اسهر
الين كيفت من بنه ومن هيله
احيان أوقف واقول اقدر وانا ما اقدر
والحظ من كم سنة راسه تحت ذيله
مستقبلي لف واعطاني قفا وادبر
والحلم الابيض تهيا وانقطع حيله
احتاج سجه وقمريه وغصن اخضر
واحتاج لي بارق يطفي العطش سيله
تعبت واحتاج جهد اكبر وحلم اصغر
واحتاج قلبِ رهيف احساس واشكي له
ياكثر ما احتاج بين الحلم والمهجر
واللي اكثرت حاجته قلب به الحيله
حزين لكن بحزني ياسعود افخر
والوقت وقتي ولو قلت محاصيله
شاعرك شاعر بتفسر القلوب اخبر
ونه بونه.. وتطبيله بتطليله
لقيت الاعمى يمشي في الطريق اعور
وابكم يغني على الاصنج مواويله
الناس قالت: وقالت: والصحيح اجدر
يمسح على الخاينه في بيت أبو نيله
البارحة جارحه لين الصباح اسفر
واخذت نومه وبعد النوم تعسيله
كتبت من حزنها يوم السحاب احمر
احساس شاعر يسمح خاطر الليله
عيضة السفياني