يوم الموادع
ياليت عزمي حديد وليت قلبي حديد
واخيط فتقٍ ماتقدر خيطه الميبره
الوقت تشويه وجهه لو يغر البليد
ماغر من يكرم الصفحه من المحبره
سقت الوفا مثل سوق العاصيه بالجريد
وان قلت وين الوفا ماحدٍ يجيب اخبره
وطلعت بالصدق يوم الصدق حبله جويد
الكذب يامثبره والغدر يامثبره
ورمتبي الجاذبيه والرمي من بعيد
مضراب كوعي ثلاث اشبار يوم اشبره
اركيت كوعي على صبري ومده زهيد
المد يامصغره والصاع يامكبره
يامقفي اقبل من الاقفاي وش تستفيد
لازم نوضح لك ان اوضاعنا مدبره
تخيل اني بعد فقدك ظفرت بجديد
ماكني اللي يبرهن كلمته منبره
الطير لاطارت امه قلت يبقى وحيد
انما تبعها وقفت اراقبه واسبره
وش عاد ياللي على صوتك يذوب الجليد
وانفاسك من افخم الكنبود والعنبره
اقفيت يوم الموادع كن فخطاك قيد
عبرت معبارك اللي ماقدرت اعبره
كسرتني كسرت المغوار من يد عقيد
كسرٍ طبيب الشميسي ماقدر يجبره
تدري متى انساك يااغلا شخص واعظم فقيد
اليا اصبح الضحك عادي داخل المقبره
سويلم الخراص