قصيدة وتر

صافي الجو

صافي الجو مير البال ما هو بصافي
كن باقصاه ريح عاتية مستبدة
فيه رجوى وليف وفيه نخوة سنافي
وفيه شيء جديد وشيء من قبل مدة
وكل ما جيت أبي أرمي بعض الأشياء خلافي
استحي لا يقول الهم ماني بقده
وما يهاب الثقال إلا الرجال الضعافي
لا تذكرت هذي قلت ما فيه صدة
ويا الله إنك تعين ويا الله إنك تكافي
من شماميت خلقك والوجيه المصدة
افرج اللي عليك اليوم ما هو بخافي
وانصر اللي لحاله واغبر الوقت ضده
ورغم مر الليالي والسنين العجافي
يأخذ الوقت حقي واعتزي واسترده
وما شكيت لهروج ولا ترجيت هافي
لين صار الرخا عندي عواصيف شدة
كل ما طال ليلي واشتكاني لحافي
ارتقص والحق لحافي مصير المخدة
ما خلقنا لنوم فوق ديباج دافي
ودايم نفوسنا للكايدة مستعدة
وشيب الرأس لكن ما بعد شاب قافي
كل يوم وسيف الشعر يزداد حده
لو غزتني همومي ما اتراجع واخافي
هم نطعن حشاه وهم آخر نقده

كلمات مساعد الرشيدي
ألحان ياسر أبو علي
غناء راشد الفارس