نص خاص

تصدين بعيونك

ياحلو الأمل والناس عنا مهم دارين
وأنا أخاف مدري ليه لا زان واحلوّا!
بأسلوبه المختلف كتب هذا الشعر الجميل والقصيد المميز. معيض العتيبي خصَّ «الرياضية» بهذا النص:

فرحت بنهار وخيّم الحزن خمس سنين
على أصدق شعورٍ خالج القلب من جوّا
أنا أقول يمكن من سببنا ويمكن عين
بعد ما تمكن في المعاليق واتقوّا
ياحلو الأمل والناس عنا مهم دارين
وأنا أخاف مدري ليه لا زان واحلوّا!
أحاول على أقصر درب يمك وأقول منين
وصلتك وقلت الله على الشوق لاضوّا
يا بردك كأن اليوم هذا ماهوب “إثنين”
وحنا اثنين وشوفي الحب وش سوى
تصدين بعيونك وأنادي وترتبكين
ربكتيني وجف الغلا بعد ماروّى
تغيرتي وعذرك صدمني ولو تنسين
أنا ما أتناسى صوت الأحزان لادوّا
أنا أقبل وفا وأنتِ تلفين وتدورين!
أنا أصدق.. وكان أكبر خطأ الصدق ياحوا!