نص خاص

الثياب الشامرة

لي شهر وشوي والتركيز ما هو باللي
ابتدي في شغلتي لكن ما أكملها
فراج الكرشمي، شاعر تعرفه الكلمة العذبة جيدًا، يلامس المشاعر ببساطته.. يكتب إحساسًا آخر كما في هذا النص الذي خص به “الرياضية”..
لي شهر وشوي والتركيز ما هو باللي
ابتدي في شغلتي لكن ما أكملها
أجمع افكاري وارتبها قبل تنفلي
واتراخى واتراجع وانشغل واجلها
كنت قبل المتر أحسب السانتي والملي
والثياب الشامرة لا يمكن أفصلها
ما خسرته قلت فاديني عساه يولي
وما كسبته من هدايا الوقت أنا استاهلها
ما أعرف أشكي لو أموت بحسرتي وبغلي
يوم بعض الناس عند الناس يستسهلها
غير للي له نحج ونعتمر ونصلي
كافل الأرزاق ماضيها ومستقبلها
في لزومي رحت قلت إني مسافر كلي
للديار اللي ماهي بوينق ما تاصلها
أثرني فقدت لذة كل شيء يسلي
والحياة اللي ترد الروح في مجملها
“فاقدٍ جمعة نشامٍ بالضيوف تهلي
من بني عمي ومن معارفي بأكملها”
في ديارٍ دل أهلها ما يوافق دلي
لو طبيعتها تخلي من يجيها يلها
جلستي بأجمل بلد على الكنب والزلي
ونقشة الشيراز والسجاد ماعادلها
جلستي في المزرعة من بعد ميّل ظلي
في صياهد من رحل عنّا وهو نازلها
جعل أبوي لجنة الفردوس يالله ياللي
من رفع كفيه يدعي دعوته تقبلها