نص
خاص الذكريات القديمة
الذكريات القديمة صارت عقوبة
لا جابها الطاري اللي ما يوديها
مشاري الرشيدي، شاعر ومنشد شاب يملك أسلوبًا مختلفًا وممتنعًا، يقدم مفردات جميلة وصورًا شعرية متعددة، خصّ “الرياضية” بهذا النص..
توارت الشمس والأنسام محجوبة
وأرضي ما أحب السكون اللي سكن فيها
مشاعري كنها بالناي مكتوبة
يا ريح هبي بنسناسٍ يغنيها
صدى لحنها الحزين إحساس وعذوبة
اللي يعاني يعيش إحساس راعيها
الذكريات القديمة صارت عقوبة
لا جابها الطاري اللي ما يوديها
واصدري اللي غدى للضيق لعبوبة
واصبري اللي عزومه جاب تاليها
واقلبي اللي توسد جرح محبوبه
واعيني اللي ما جاب النوم طاريها
للشوق صحوة تدخلنّي بغيبوبة
وأصحى وأنشّد جروحي وش مصحيها
والنعم بالوصل وإلا الهجر والكوبة
سم اسمها يا حبيبي وش تسميها
قل الصراحة تراها منك مطلوبة
متى تعود الحياه إلى مجاريها
كان اللقاء كل يوم ترحب دروبه
وقبله تراحيب حضنك كني أوحيها
ما عذرب الحب قلبٍ حب عذروبه
وروحه من الشوق فيها ما يكفيها
طولة غيابك ما هي ذنبٍ من ذنوبه
فرقا يا فرقاك لا عادت لياليها
حبك هو الغلطة اللي ما لها توبة
ولا توقعت من قلبي يسويها