نص جديد

ليالينا رهينة

شدينا وخلينا ملامحنا على الجدران
تدفي برد وحشتها بضحكتنا وأمانينا
تنادينا وتبكينا وجع تلويحة البيبان
وصدينا أسف وآهاتنا تسحب خطاوينا
بكت غرفة رُبا فيها عمر مكتظ بالحرمان
وحصير أحلامنا ما مل من لمة حكاوينا
تجاعيد الزوايا وجه أبوي الممتلي كتمان
وحلم أمي وبستان الطموح المنغرس فينا
حزين الحي والحزن العظيم بنظرة الجيران
منازلهم تودعنا وذكراهم تواسينا
حكايات الطفولة عالقة في مسمع الوجدان
أثرها لين هاللحظة يذكرنا بأغانينا
شطانتنا، براءتنا، مسابقنا على الدكان
سعادتنا تسابقنا ونصرف كل عيادينا
تحت غيمة طُهر نلعب وزخات المطر تحنان
نطير من الفرح بس الرعد صوته يبكينا
وفالبيت الجديد أغراب نتوجع من الفقدان
نشب الشمع بعيون السهر والريح تطفينا
ليالينا رهينة ذكريات وغربلة وأحزان
من اللهفة تلحفنا سراب أفراح ماضينا
فمان الله ودموع الأسى فالشارع الذبلان
تفضفض للرصيف الغارق بغصة مرابينا