التعب

مضى لي زمن مانيب طيب يا ابو بسام
تخاطفني سهوم الهواجيس يومياً
على فكري الخصب و على احساسي اللوّام
و على راسي الصلب و على قلبي اللين
يمر الشعور المر ماهو مرور كرام
مثل قسوة التأنيب في خلوة الدين
على هامش احداث الحياه احسب الأيام
ولو ماني بمزعوج من شي معين
سقى الله يوم ان العمر رحلة استجمام
قبل يصغر الحلم و قبل يكبر الهيّن
وهالحين احس ايام عمري ما غير ارقام
تساوت بعيني كلها قشر ومزيّن
رمادي شعور اشوف الاشيا بدون الهام
ما كني يا ابو بسام . بسام وحنين
ما عاد ابتهج حتى بطق المطر للجام
وما عاد اتلذذ باي حاجة نهائياً
لو اتصنع الضحك ولو احارب الأوهام
ملامح حياتي شاحبه والتعب بين
ليا صار هذا جدولي والشهر عن عام
لو انك مكاني يا صديقي وش تزيّن؟
يقولون لي طب الهواجيس صل ونام
وانا عيوني امرهن على النوم ويعيّن..