زوايا المدينة

غبتي وضاقت بي زوايا المدينة
لين اصبحت عندي سجن ماله ابواب
انا سجين الهم وانتي سجينه
في دار من لا يعرف احساس الاحباب
مدري متى تنزل عليه السكينه
والا يغيب غياب ما بعده غياب
اللي سعى لأغراق ذيك السفينه
واغرق على الساحل من الدمع ركاب
عقب الفرح خلا المشاعر حزينه
هذا هو اللي ما حسبنا له حساب
الحقد وانواع الحسد والضغينه
في قلب حاقد سببت هجر الاقراب
والحلم كنا بالرجاء واصلينه
لكن تبخّر واختفى بعد ما ذاب
يامترفه لو الترف ما تبينه
ما للترف عندك مشاريه وعتاب
اللي تقطع سبحته في يدينه
يفقد خرزها لا تنثّر بالاسياب
اللي شماله يسبق اللي يمينه
وعيون خلق الله على دربه حراب
حاول عن احراجه يخاطب قرينه
لكن قرينه صك في وجهه الباب
كنه يقول الخير وينك ووينه
واللي زرعته فيه كل الرجاء خاب
اللي ورى حدب الحنايا دفينه
بانت ومنها نال الاعجاب الاعجاب
تقول لأصحاب العقول الفطينه
المختفي للناس في راس مرقاب
وشلون ما تصبح زوايا المدينه
مثل السجن لكن سجن ماله ابواب