هجره

والله ان الحزن ما ياوي ليامن طق صدره
ووالله ان الحظ مال بخطوتي ميلة عقالي
بين ألف من الأماني وألف من خيبه وحسره
مالقيت شعور يستر غيبتي، وإلا انعزالي
يا ملبّسني : تفاصيله، معرّيني: بهجره
مبتعد بالخير من لحظة عرف وشلون حالي
البقى لله فـغيابك وطول الصبر ب أجره
والهوى ماله بعد ما اقفت بك الأيام والي
كنت اظن انك عمر باقي ولا يمكن اخسره
لين ما وقفتني في وجه خيباتي ، لحالي
غيب واتركني مع اوجاعي وماضيك بعبره
ما فقدتك جاه ، لو اني ابفقد راس مالي
غيب واخذ احساسي المتمادي بقله وكثره
علم بقلبي .. وسرّ اللي تعلمك الليالي
مابقى فالذاكرة موقف حلو ما اعطاك عمره
ولا بقى فالناس من يوقف معي وقفة ظلالي
الأماني غاليه وغيابك القاسي بعذره
والشعور اللي يمر القلب لا مرّيت غالي
بعت قلبي؟ ايه لكني كبرت و صرت ما اشره
صرت اجي واروح لا احتاجك ولا تطري فبالي