الشوق
الشوق عمره طويل ولا علـى الصبـر زود
وان طال عمر الجفاء جف القلـم والكـلام
اخايـل الشعـر وبروقـه حديـث الرعـود
ويسمي الخيـر وجروحـي حديـث الظـلام
ما اقول صدري هو اضيق صدر في هالوجود
لكني احس بيـن ضلـوع صـدري غـرام
لو للمقادير مـع وجـه البـن ادم وعـود
ان كـان مـرت مصايبنـا مـرور الكـرام
لقيت عمر الفرح ينقص وحـــزني يزود
وانا على ايات حـال اعامــله باحتــرام
طبيعتي لا انكشف ستر الزمن عن جــحود
امد له غصــن زيتـون وحمامة ســـلام
من رحمة الله ما نقرا عيون الحســـود
ولا نشوف المغطّى في صدور الآنــــام
ولاّ كثر ما تشيل العــالم قلــوب سـود
ماعاد يبقى على الدنــيا خـوال وعمــام
اعيش جو السعاده بالدعــاء فالــسجود
لاطرّف اللــيل ثلثينه وعــز المـــنام
الله يخلـي لقلبـي ضحكـة اربــع ورود
ويقر عيني بشـــوف النور عقب العتـام
ياليت شعري ,, الا ليـت الليالـي تعـود
يـوم التجافـي دقيقـه كنـه فـراق عـام
اسألك باللـي جعـل كلـك رهـاوة عـدود
لا تبطـي عروق قلبي من قراحك حـيـام
من يم دمعي حدر والضيق يرقى سنــود
لو قلت لك طــيب وكلش على مايــرام
صدقنـي انـي فقدتـك والجوارح شهـود
ارجـوك لا تعتبـر بعـدك سبيـل انتـقـام
أي والله اخطيت في حقـك وجيـت مهدود
اشيل عذري لــعل العذر قـد المـقـام
اخطيت والبعد يوجعنـي ولا انت محـدود
تحـط بينـي وبينـك فالمحـبـه نـظـام
عشت الغلا فـي شبابـه لا تخليـه عـود
والعود ما يطلـب الله غيـر حسن الختـام