سيد الدنيا
بلادي عاد عيدك يا بلادي والعمار بزود
عظيمة والبشاير كل يوم يهل وابلها
نردد سارعي للمجد والعليا إلى المنشود
تقوينا الإرادة والثوابت ما نبدلها
على تسع وثمانين البنا نستقبل الموعود
سعوديين والشيمه بنا تلقى منازلها
شهر عبدالعزيز العود والله يرحمك يالعود
عقب ماهي عجوز جدد صباها ودللها
شهر يوم الهنادي ما تبات شباتها بغمود
وكفكف دمع نجد اللي عقب ما غاب زاملها
معزي ما يغيب بكل شبر بدارنا موجود
ونروي سير التوحيد عن باني فعايلها
وطنا يامناره للسلام ببذلك المحمود
وطنا ياملاذ الجار لا كبرت معاضلها
ملوكك هم سعودك والفياصل بالخلود فهود
عباد الله حماة الدين سم كبود عاذلها
سلام الله على سلمان سلمان الحزم والجود
ملكنا اعظم حيود الرجال بفعل واطولها
تحت أمره نسير وكلمته امضى من البارود
أبونا شيخنا زيزومنا شاهر مصقلها
هو اللي يخمد الفتنه بعزم المستنير الطود
وبقايا جمرها يكوي بها يدّين مشعلها
وسيفه لاجمع مكر الاعادي بالزمان حشود
هو الجيش السعودي بالوغى مصنع بواسلها
ومقدهم ولي العهد وهذا يومه المشهود
تخف حمولنا واللي ثقل محمل سنابلها
سراجه رؤيته والفكر ما تلحق مداه حدود
له التبجيل والبيعه من آخرها إلى اولها
على همة شبابة يستحث الفكر والمجهود
شهر واعداه ذاقت دهاءه ما يهولها
وعيدك ياوطن نسمة براد وذعذعات العود
تعم جبالها وتلاعب عطوره سواحلها
وحنا بالوطن نستقلبه بشعورنا المعهود
تقوم العرضه اللي من جمام المجد منهلها
بلادي هيبة العزم العتيد ومجده المدود
عظيمه عظم الله شان من همه يجملها
تحيتنا لقايدنا شذاها من هبوب النود
على نسل الائمه عالي الهمه ومدهلها
سلام الله عليه بكثر ماهو حاضر وموجود
لحاجات البلاد بقول تم وسم ازهلها
وقوفه للأمانه سهره يوم العباد رقود
جهوده واضحه واخلاصه الميمون كللها
هو الحيد المهاب وهيبته قيمه وورث جدود
هو السيل العميم ومالي الدنيا ومشغلها
هو اللي يوقد الراي السديد بحلمه المشهود
ملكنا سيد الدنيا وماليها ومشغلها