الغصن

قال لي عصفور فوق الغصن شادي
شايفك محتارة بنفسك .. علامك؟
ما لحسنك حل وشروط ومبادي
أجمل من الكل .. حتى في منامك
لك ملامح صاخبة .. وإحساس هادي
وفتنتك تبدأ .. قبل يبدأ كلامك
حسنك المقياس : للي غير عادي
وكل باقي الحسن .. أصغر من مقامك
لا مشيتي .. كن خطواتك تنادي
بالمدى .. والناس تتخيل سلامك
من يشوفونك .. يبوسون الأيادي
ومن يعرفونك .. يموتون بغرامك
مبسمك ما يترك لمثلك أعادي
خوف لا تصيرين أجمل في خصامك
إنتِ أجمل من تنزه في فوادي
عايش بنورك ومفتون بظلامك
وجهتي وخطاي لك غاية مرادي
وفرحتي .. بعيونك ورقة سهامك
افرحي .. باقي شعور المر غادي
ولا بيبقى غير .. لحظات ابتسامك