ليل الشتاء

الليل .. باب القصيد وستر لـ الدمعتين
اليا بكى .. من تذكر واحد غاب له
يـ شاعر الليل .. لا تبخل على السامرين
لا شح ... غيم الشعور ولا انتثر وابله
استرسل البوح بـ حروفك اماسي وبين
الشاعر ان شاب .. قاف الشعر ما شاب له
من طول ليل الشتا .. يـ ضيق بال الحزين
اليا سرت سلوته .. والنوم ما طاب له
جلس يعيد النظر .. فـ الفايت من سنين
وان الزمن كم خذا منه .. ولا جاب له
كبر انهياره .. يزيده قو باس ويقين
وايام الانسان فيما يجهله .. حابله
صابر يشوف الليال السود في نص عين
وايامه البيض يرقبها تجي القابله
ما لين الوقت راسه .. ليت قلبك يلين
وتنساق كلك على دربه .. وتنساب له
لو عشت في حيرته .. اليا ذكر غايبين
وافكاره الرافضه .. وافكاره القابله
م بين هقوه تخيب .. وبين شكه وبين
كم حقق ظنون خلق الله وكم خاب له
ان قلت مجنون .. يازن عقله العالمين
وان قلت عاقل .. تشوف ان الزمن هاب له
على مفارق طرق .. ما يدري الدرب وين
يـ ضيعة خطاه من درب ليا عاب له
عقله يقول الفتى .. م يطرد الراحلين
وقلبه يقول الفتى .. يحتاح لـ احباب له
خصومه اثنين .. يوم احتار بـ امر الثنين
من ياخذ الحق منه .. ويحسب حساب له
محتاجك انسان .. فاقد دافي الراحتين
جسمه نحل من جفاك .. ونظرته ذابله
وجهه فقد ضحكته .. لو ضحكت الشامتين
تقتل من احلامه الواجد .. ولا طاب له