حاول تغيب
عاد الشعور المنشغل فـ / ابتعاثه
لو بعثته خلف الظلوع المحاديب
فالقلب ( مملكته وبيته واثاثه )
ماله لا منفذ رقعي ولا نويصيب !!
عود عقب صلى صلاة استغاثه
والجو زان .. وعارضه بالتراحيب
عن زحمة العالم .. ذكوره وإناثه
يا ماحلا السجه على غير ترتيب
في موقعٍ مافيه .. حسد وخباثة
كنه يقول : عن العمل حاول تغيب
الجو جو .. “ اثنين والا ثلاثة “ !
رابعهم العزبه وخامسهم الجيب
خل الرومنسيه وخل الحداثة
وارجع على عديت روس المراقيب
دام الزمن مافي جنابه دماثة
نبي نعيش ايامنا عيشة الذيب
البر حبه .. طبع مدري وراثة
بس الوكاد انه علاج الهناديب
لا احدٍ يقول : البر هم وغثاثة
يومٍ كلٍ له شفوف ومطاليب
سلم على اللي ما يخلي (تراثه)
لا صار ما حوله ضعافه ولا عيب!
مساحي الفلاح راع الحراثة
في عينه اغلا قدر من شمخ النيب
اقرأ أكثر عن:
شعر وقصيد