صوتك المبحوح

على كثر الوجيه الغايبه عن راسي المزحوم
حضر وجهك نيابه عن عموم وجيه غيابي
يعس في قاع بالي فيضة جروح ومناقع لوم
وينصب له خيام من السهر ويطير أسرابي
يحوم فجو ذاكرتي كلام ما يمل الحوم
وكثر ما أردد عتابي عليك اعتب على عتابي
خذاك الحلم من نوم العوافي لين صح النوم
وخذاني ليل لا جيت ارقده .. وقف على أهدابي
تقديني طيوفك ما تقديني عليك نجوم
تدوزن خطوتي نبرة: أحبك.. وتغنابي
أدور لي سبب للخوف من قولة: “رجع مهزوم”
وأنا خايف ما عاد أخاف لا خوفي ولا أسبابي
حبيبي صوتك المبحوح يشبه مسكك المختوم
يمر الصوت باذني واتعطر منه ثيابي!
حبيبك ما خلقه اللي كتب له يعشقك معصوم
خلقه بعقل كهل وقلب طفل وفطرة أعرابي
شف أحبابي عطوا قلبي مفارقهم وهو محروم
تراني.. مابقى الا أفارقك واخلص أحبابي
تعال وجيب معك “بخير” وأنا أجيب “جعله دوم”
على مسكة يدينك صعبه أني أمسك أعصابي
أنا الجاني وأنا الظالم وأنا المجني وأنا المظلوم
وأنا اللي مت بك.. يوم أنت لين أموت تحيابي
قسم بالله ما جاني مكابر مثل ذاك اليوم
خطيت وقلت: أبي منك تفارقني.. وأنا مابي