نص
خاص مشوار عمري
أحب أختلي بالنفس عن جلسة الخالين
وأحب أحمل هموم الليالي على امتاني
خزام السهلي، الشاعر السعودي الحاصل على المركز الخامس في النسخة السابعة من “شاعر المليون”، واصل بعدها في نثر إبداعه، وفي قصيدة خص بها “الرياضية” روى من خلالها تجربته في الحياة.
رحل من رحل والخير في الصفوة الباقين
ما دام الليالي ماضية والعمر فاني
يقولون بتشين الليالي وإذا ب تشين
فلا هدت عزومي ولا هزت إيماني
من اعتاد ضحك السن يعتاد دمع العين
ومن يجاهد أحلامه ورغباته يعاني
مشيت الطريق اللي يودي لمدري وين
وأنا وين ما تاخذني خطاي وحداني
أحب أختلي بالنفس عن جلسة الخالين
وأحب أحمل هموم الليالي على امتاني
يا ليت أكشف النيات قبل الكنين يبين
ويا ليت اللي أحسه بقلبي على لساني
بمشوار عمري سقت مهر الطموح سنين
ولا حاشت يدين التعب غير خذلاني
وعلى كثر ما أغرس في نفوس الأوادم دين
يا كم كبرت الهقوة بصاحب وخلّاني
تجرعت مر الصبر من مشرق العشرين
وأنا عارف أن الصبر ما هوب مجاني
صبرت وعسى أيام القسى تنتهي باللين
وعسى فرحتي تطغى على وجيه عدواني
لو أعيش عمري ما معي قيمة البنزين
معي ما كفاني منة الخلق وأغناني
مواقيف عودٍ فزعته فاللزوم تبين
هي الملتجى بعد الله ووقفة وإخواني
عن أصحابي الوافين وأحبابي الغالين
وعن القاصي من الناس يكفون والداني
وعن اللي بقلبي ليت يا غايبة تدرين
صحيح افترقنا مير ما عاد بامكاني
أساير مع جروحي ظروف الزمان الشين
وأشرع للآمال الجديدات بيباني
بنينا الغرام سنين وانهد في يومين
ولا أدري من المجني ولا أدري من الجاني
بقى لي عقب فرقاك ذكرى ودمعة عين
وتصفيق جمهوري وصح الله لساني